Tino Seco, veciño de Cervás, ven de ser proclamado pola Asemblea Local do BNG de Ares candidato á alcaldía para as próximas eleccións municipais do mes de maio de 2023.

Que supón para ti pasar de ocupar o cargo de Responsable Local a ser a persoa que encabece a candidatura do BNG?

Pois moita responsabilidade, xa que o BNG ten o cometido de desenvolver un proxecto político que aporta solucións aos problemas reais da xente e que pode permitir alcanzar ese Ares que desexamos.

O BNG ven de renovar nos pasados meses os seus cargos electos no Concello, coa entrada de Carme Brage e Miguel G. Paz, o teu nomeamento vai supoñer unha continuidade ou unha renovación no BNG de Ares?

Pois ambas cousas, no BNG levamos unha traxectoria moi contrastada de traballo no concello, con propostas e liñas de actuación en todos aqueles temas que afectan á nosa veciñanza, sendo a forza política que encabeza a oposición ao goberno do PSOE-NAL, e nesa liña pensamos continuar. Pero tamén entendo que o feito de que outra persoa encabece o proxecto vaille dar a este un maior impulso e transmitir á xente a capacidade que temos no BNG de ser unha forza política activa e vital.

Cales son ás túas motivacións para participar de xeito activo en política?

Eu creo na acción social como un xeito de mellorar a vida das persoas, participar en política é, e sempre debería ser, estar ao servizo dos veciños e das veciñas dende o que é noso, as institucións locais, a forma de participación regrada que sustenta unha democracia.

Cal é a túa análise da situación do noso concello de Ares?

Vivimos nun Concello con moitas potencialidades pero desafortunadamente estan a desaproveitarse. O goberno municipal está instalado nunha inercia rutineira que nos fai perder moitas oportunidades de desenvolvemento. Un exemplo do que estou a dicir é o caos do transporte público, que tantos prexuízos nos está a causar a grande parte da veciñanza de Ares, onde botamos de menos unha acción decidida por parte do alcalde, mais alá de proclamas de cara á galería, pero na realidade é que mostra unha clara sintonía coa Xunta do PP.

Un goberno do PSOE-NAL que, pese a contar cunha maioría absoluta, é incapaz de desenvolver as súas propias iniciativas, as escasas que ten, a tempo e de xeito correcto. Vémolo cando son incapaces de aprobar os seus propios orzamentos no prazo que marca a lexislación, no exercicio actual aprobáronse con 3 meses de retraso. Máis recentemente, asistimos ao esperpento de aprobar unha normativa de aparcadoiros con só dous días de antelación á súa suposta entrada en vigor, pero que aínda non foi publicada a súa aprobación definitiva polo retraso na resolución das alegacións, que non fixo máis que crear desconcerto e molestias durante todo o verán ás persoas usuarias dos aparcadoiros, tanto aos veciños e ás veciñas de Ares como a turistas e visitantes.

En resumo, un goberno sen ideas, incapaz de dialogar, instalado nunha continua acción de propaganda e de auto-bombo, que non é quen de aportar as solucións que Ares precisa.

Ante este escenario que presentas, cales son as solucións que propós?

Dende o BNG temos claro que non hai unha variña máxica que veña a resolver de golpe todos os problemas que temos en Ares e que temos que ser moi realistas dada a situación de forte endebedamento á que nos levaron estes anos de gobernos do PSOE-NAL-SondeAres, que fixeron do noso Concello un dos máis endebedados de Galiza.

O Concello ten que estar ao servizo dos veciños e das veciñas e non ao servizo dos políticos que o dirixen.É preciso escoitar, dialogar e gobernar baixo esta premisa.

Deixar de despilfarrar os cartos públicos en actuación e obras con fins propagandísticos que non responden ás necesidades da xente e establecer un plan plurianual de mellora dos servizos públicos baseado nas necesidades reais e reclamar con firmeza do resto das institucións a súa implicación na súa dotación e mellora. Sempre poño como exemplo que resulta moi clarificador o que acontece co abastecimento, que agora -logo de quince anos de goberno sen facer práticamente investimentos- semella que o goberno municipal descubríu que é unha prioridade; tal e como estivemos a defender reiteradamente desde o BNG.

A goberno PSOE-NAL ven de aprobar un plan de urbanismo que non contou co consenso preciso e non da solucións aos problemas urbanísticos de Ares, moitos deles xerados no goberno do PP, o que fai que teñamos unha grande cantidade de edificacións sen ocupar e moitas elas sen rematar. Temos que sentar as bases para corrixir as eivas deste PXOM, dar solucións ás persoas que pretenden rehabilitar ou construír a súa vivenda nos núcleos rurais e crear plans de recuperación de vivendas dos núcleos tradicionais de Ares e Redes.

É preciso artellar accións decididas para conservar, restaurar e poñer en valor o noso patrimonio natural e cultural, nomeadamente artellar una solución para Santa Catalina de Montefaro, que implique a todas as administracións nun plan que dunha vez por todas dea unha solución definitiva á nosa xoia artística.

Ares necesita un contedor cultural, necesitamos construír un auditorio no que a música, danza teatro... sexan as protagonistas dunha política cultural que brilla pola súa ausencia.

Afrontar dunha vez por todas a tan necesaria ampliación do CPI As Mirandas poñéndose á fronte das demandas da comunidade educativa e reclamar ante a Consellería de Educación un compromiso que comprometa prazos e obras.

Poñer de xeito transversal en todas as nosas políticas municipais un compromiso claro coa nosa lingua, o feminismo e a igualdade, prestando especial atención á mocidade.

En fin, son moitas liñas que iremos desenvolvendo e artellando nos próximos meses nos que o contacto coa veciñanza vai ser un instrumento fundamental que nutra de propostas o noso programa de actuación.

Con que expectativas afrontas as eleccións municipais do vindeiro ano?

Non nos marcamos ningún tipo de límite, estaremos onde a cidadanía de Ares nos queira situar, pero o que si percibimos nas conversas coa xente é a necesidade de pasar páxina deste goberno PSOE-NAL que non foi quen de sacar proveito para Ares da súa maioría absoluta e que ve no BNG unha opción útil e necesaria.